“En noe dan?”

“En noe dan?”

Ellef , ’t magies vastelaovessiefer. Dao bleef in juni de tèller op sjtaeke bie ’t tèlle van ‘t aantal inzèndinge veur de vastelaovessjlager 2019. Ansich ein sjoon aantal, dus waar de gebroekelike veurseleksie neit neudig. Alle 11 inzèndinge hawwe zich geliek gekwalifiseierd veur ein plaatsj in de finale. Pès dat ein paar daag later zich nog inzènding nómmer twellef aandeinde!  Die bleek namelik in de sjpemboks terech te zeen gekómme en daorom gemis.
En noe dan?
Aangezeen ouch nómmer 12 aan alle reglemèntaere veurwaarde haw voldaon is besjlaote dit leidje aan de 11 finaliste toe te vouge mit es gevolg dat veer dit jaor ein unieke aovend höbbe. Eine finale-aovend mit 12 leidjes! Daomit kriege de sjuries van deze aovend ein zjwaor taak toebedeild.
Aangezeen d’r gein veurseleksie haet plaatsjgevónje höbbe veer dit jaor naeve de gebroekelikke deskundige vaksjurie ein ekstra sjurie van prominente Zitterder samegesjtèld, ónger bezielende leiding van burgemeister Sjraar Cox. Zie bepale, same mit uch hie in de Sjpeigeltent , welk leidje het predikaat Zittesje Vastelaovesjlager 2019 krig.
Sjus wie veurgaonde jaore wurt jeder leidje geprizzenteierd mit eine begeleidingsbandj wederom verzörg door Sjtudio Theelen. Veer zeen van meining dat dit de prizzentase en ’t óngerling vergeliek tössje de leidjes geliekwaardiger maak.
De 6 bèste leidjes van vanaovend waere oppe nuuj Marotte CD oetgebrach, mit daobie ei tienerleidje en weier ‘t kènjerleidje. De Marotte CD 2019 is vanaaf de 11e van de 11e verkriegbaar.
Veer wunsje uch op deze aovend vol vastelaovesklanke väöl sjpas en lol en wiesheid bie ’t keize van de Zittesje vastelaovessjlager 2019. Eine sjlager dae kòmmend vastelaovessezoen in gans Zitterd te heure zal zeen. Eine sjlager dae de Zittesje vastelaovend hoog hiltj, dae de luuj aan ’t zènge en sjprènge krig mer veural de luuj verbèndj.
Alle komponiste, tekssjrievesj, zèngesj, artiste en juries van vanaovend väöl sukses gewunsj.

Marc Verblakt